Tuesday 31 October 2023

ସମୟ

କାର୍ତ୍ତିକ ମାସ, ପ୍ରଥମ ସୋମବାର  । ସଞ୍ଜ ହୋଇ ଆସିଥାଏ । ବୋଉଙ୍କୁ ନେଇ ମନ୍ଦିର ଯିବା ପାଇଁ ବାହାରି ଥାଏ । ଛ' ବର୍ଷ ର ଝିଅ, ଧାଇଁ ଆସି ଭିଡି ଧରିଲା । ଏକା ଜିଦ୍ ସେ' ବି ଆସିବ । ମୁଁ ବି ଭାବିଲି, ଆସୁ ଝିଅ ଟା । ବାହାରେ ବୁଲିଲେ ଦେହ ପା' କୁ ଭଲ । ମନ୍ଦିର ଯିବା ଆହୁରି ଭଲ । 
ମନ୍ଦିର ବି ଅଧିକ ବାଟ ନୁହଁ । ଚାଲି ଚାଲି ଗଲେ ଅତି କଷ୍ଟ ରେ ପାଞ୍ଚ ମିନିଟ ଲାଗେ । ବୋଉଙ୍କ ଚାଲି ଅତି ଧୀର ତ' ଦଶ ମିନିଟ ଖଣ୍ଡେ ଲାଗିବ । 
ରାସ୍ତା ରେ ଗାଡି ମୋଟର ବହୁତ ଯିବା ଆସିବା କରୁଥାଏ । ଛ' ବର୍ଷ ର ପିଲା କ'ଣ ଏକା ଯାଇପାରିବ  ! ତେଣୁ ତା' ହାତ ଧରି ଚାଲୁଥାଏ । ବୋଉ ପଛେ ପଛେ ଧୀରେ ଧୀରେ ଆସୁଥା'ନ୍ତି  । ମୁଁ ଆଉ ଝିଅ ଚାରିପାଦ ଚାଲୁ, ପୁଣି ମିନିଟିଏ ଅପେକ୍ଷା କରୁ ବୋଉ ପାଖକୁ ଆସିବା ଯାଏଁ ।
କିଛି ସମୟ ପରେ ଅନୁଭବ କଲି, ବୋଉ ଠିକ୍ ରେ ଚାଲିପାରୁନାହାଁନ୍ତି । ତାଙ୍କ ହାତ ନ ଧରିଲେ, ପଡିଯାଇପାରନ୍ତି । ସେପଟେ ଛ' ବର୍ଷ ର ଝିଅ । 
ଝିଅ କୁ କହିଲି, "ମା' ଲୋ, ତୋ ହାତ ଛାଡୁଛି । ଧୀରେ ଧୀରେ ଚାଲିବୁ । ଗାଡି ମୋଟର ଅଛି ନା' ମୋ ପାଖେ ପାଖେ ଥିବୁ ।"
ସେ' ବି ହଁ କହିଲା । କାତରତା ସହ ତା' ହାତ ଛାଡିଲି ।
ଗୋଟିଏ ମିନିଟ ଯାଇଛି କି ନାହିଁ, ଦେଖିଲି, ଝିଅ ଡେଇଁ ଡେଇଁ ଗୀତ ଟିଏ ଗୁଣୁଗୁଣେଇ ଧାଉଁଛି  । ବୋଉଙ୍କ ହାତ ଧରି ମୁଁ ଚାଲୁଛି, ତେଣୁ ଧାଇଁଯାଇ ଝିଅକୁ ଧରିହେବନି  । ତେଣୁ ବଡ ପାଟିରେ ଡାକ ଦେଲି, ମା' ଲୋ, ମୋ ପାଖେ ପାଖେ ରହ । ମିନିଟିଏ ପରେ ଦେଖିଲି, ସେ ଡେଇଁ ଡେଇଁ କେତେ ଆଗକୁ ଚାଲିଗଲାଣି  । ପୁଣି ବଡ ପାଟିରେ ଡାକିଲି । 
ସେ' କିନ୍ତୁ ବୋଧେ ମୋ ଡାକ ଶୁଣିପାରିଲାନି  । ତେଣୁ ବୋଉଙ୍କ ହାତ ଛାଡି ଝିଅକୁ ଧରିବାକୁ ଧାଇଁଲି । ମୋ ମନରେ ପୁରା ଭୟ, ଗାଡି ମୋଟର ନ ଦେଖି ଝିଅ ଧାଇଁ ଚାଲିଛି, କଣ ହେବ କଣ ନାହିଁ । 
ଟିକେ ବାଟ ଧାଇଁଛି, ବୋଉ ସେପଟେ ଚାଲିବା ବନ୍ଦ କରି ଠିଆ ହୋଇଛନ୍ତି । ଆଗକୁ ଝିଅ ପାଖକୁ ଯିବି ନା ପଛକୁ ବୋଉଙ୍କ ପାଖକୁ ଯିବି ମୁଁ ଆଉ ସ୍ଥିର କରିବାରେ ଅସମର୍ଥ ହୋଇପଡିଲି
 । 
ଏପଟେ ଦେଖିଲି, ଝିଅ ସମସ୍ତ ପ୍ରକାର ଚିନ୍ତା, ଭୟ ମୁକ୍ତ ହୋଇ ଖୁସି ମନରେ ଡେଇଁ ଡେଇଁ ଚାଲିଛି । ସେପଟେ ଦେଖିଲି ବୋଉ ଧୀରେ ଧୀରେ ପାଦ ବଢେଇ ଚାଲୁଛନ୍ତି ।
ଝିଅକୁ ଧରି ତା' ଖୁସି କମ୍ କରିବାକୁ ମନ କଲାନି, ବୋଉଙ୍କ ହାତ ଧରି ତାଙ୍କ ଆତ୍ମବିଶ୍ୱାସ କମ୍ କରିବାକୁ ମଧ୍ଯ ଠିକ୍ ଲାଗିଲା ନାହିଁ ।
ସେମିତି, ସେଇଠି ଠିଆ ହୋଇ କେତେବେଳେ ଝିଅକୁ ତ କେତେବେଳେ ବୋଉଙ୍କ ଦେଖୁଥାଏ ।
ଭାବିଲି,  ବୋଧହୁଏ ଏହାହିଁ ସମୟର ଚକ୍ର । ମୋ ପିଲାଦିନ ଏମିତି ଡେଇଁ ଡେଇଁ ଚାଲିଯାଇଛେ, ବାର୍ଦ୍ଧକ୍ଯ ଧୀରେ ଧୀରେ ପଛେ ଆସୁଛି । ଆଉ ମୁଁ ଏମିତି ଚାହିଁରହିଛି । କେତେବେଳେ ମୋ ପିଲାଦିନର ସ୍ମୃତିକୁ, ତ କେତେବେଳେ ଭବିଷ୍ୟତ ର ଚିନ୍ତାକୁ ।

Saturday 3 June 2023

ଏଥୁ ଅନ୍ତେ ।

 ଥୁ ଅନ୍ତେ .. 

ଦେବ ଦୈତ୍ୟ ଭେଦ ମିଟେ 

କଚ୍ଛପ ର ପୃଷ୍ଠ ପରେ ପର୍ବତ ର ଭାର ଉଠେ

ମନ୍ଥନ ର ମାର୍ଗ ଦେଇ ଉଚ୍ଚୈଶ୍ରବା ନଭେ ଉଠେ

ହଳହଳା ବୃଷ୍ତି ଦେଖି ନୀଳକଣ୍ଠ ଜାଗି ଉଠେ

ଅମୃତ ର ପ୍ରାପ୍ତି ସହ ଯୁଦ୍ଧଭେରୀ ବାଜି ଉଠେ ।

ଏଥୁ ଅନ୍ତେ, 

ଛଳନା ର ଅଶୀଧାରେ ସ୍ୱରଭାନୁ ମୁଣ୍ଡ କଟେ । 


Sunday 11 March 2018

ଆଉ ଏକ ନଚିକେତା

ସବୁକିଛି ବୁଝି ମୁଁ ଭୂଲ୍ କରିଯାଏ
ଆଉ ଏକ ନଚିକେତା ମୁଁ
ମୋକ୍ଷର କାମନା କରି
ପୁନର୍ଜନ୍ମ ମାଗିଦିଏ ।

 

Saturday 10 March 2018

ଭାବନା


ଭାବନା ଅନନ୍ତ ଶବ୍ଦ ସୀମିତ
କହିବି ବା କଅଣ
ଲେଖିବି ବା କଅଣ
ତମସା ଅନନ୍ତ ଦୀପ ସୀମିତ
ଭାବନା ଅନନ୍ତ ଶବ୍ଦ ସୀମିତ ।।

ପୂର୍ଣ ଜୀବନ, ଅଭାବ ଅଛି ତଥାପି
କଳ୍ପନା ଅତୀତ ଭାବ ଅଛି ତଥାପି
ଦେବ ଆଶୀଷ ବା ମିଳିବ କାହିଁ
ଅର୍ଚ୍ଚନା ଅନନ୍ତ ପୂଜା ସୀମିତ
ଭାବନା ଅନନ୍ତ ଶବ୍ଦ ସୀମିତ ।।


ନିରାଶା ର ନୁହଁ ଭୟ ଆଶା ର 
ସୁରଭି ର ନୁହଁ ମୋହ ପୁଷ୍ପ ର 
ବୃତ୍ର ଅନ୍ତ ଇନ୍ଦ୍ର କରିବେ କେମିତି 
ଦଧୀଚି ଅନନ୍ତ ଅସ୍ଥି ସୀମିତ 
ଭାବନା ଅନନ୍ତ ଶବ୍ଦ ସୀମିତ ।।

ଜାଣେ ପୁଣ୍ୟ କିନ୍ତୁ କରି ପାରେନି 
ଜାଣେ ପାପ କିନ୍ତୁ ଛାଡି ପାରେନି 
ନଚିକେତା ମୋକ୍ଷ ପାଇବ କେମିତି 
ପୁନଃ ଜନ୍ମେ ଯେଣୁ ଆଶା ଜଡିତ 
ଭାବନା ଅନନ୍ତ ଶବ୍ଦ ସୀମିତ ।। 

Tuesday 31 October 2017

ଆସ ଥରେ ..

ଶୀତ ସକାଳ ର ଖରା ଭଳି
ଆସ ଥରେ ବୁଲି ମୋ ଅଗଣା ରେ,
କାକର ରେ ଜୁଡୁବୁଡୁ ଫୁଲ ଯେତେ
ହସି ଉଠୁ ତୁମ ଉଷ୍ମତା ରେ ।
ହଟାଇ କୁହୁଡି ଦେଖାଇ ଦିଅ
ସୁନେଲି ସୁରୁଜ ଆକାଶ ରେ ॥



Sunday 11 October 2015

ମୋ ଓଡିଶା

କଟକ ଆକାଶେ ମକର ଗୁଡି
ଚିଲିକା କଙ୍କଡା ମାଛ ଚିଙ୍ଗୁଡି
ଜଗନ୍ନାଥ ଧାମେ ସିନ୍ଧୁ ଲହଡି
ପାରାଦୀପେ ନବ ନଉକା ଝଡି ।
ଦେଖିନ ଯଦି, ଆଉ କଣ ଦେଖିଛ ??

ମାଲ୍ୟବନ୍ତଗିରି ବଣ୍ଡା ପ୍ରଦେଶ
କୋରାପୁଟେ ଗୁପ୍ତେ ଇଶ୍ୱର ବାସ
ଝରିଗାଁ ଚନ୍ଦନ ଧାରାର ରାସ
ମିନାଝୋଳ ନଦୀ ଜଙ୍ଗଲ ଦୃଶ ।
ଦେଖିନ ? ତ ଆଉ କଣ ଦେଖିଛ !!

ପୂରାଣ ପ୍ରସିଦ୍ଧ ଗିରି ମହେନ୍ଦ୍ର
ବୌଧ ରାଜବାଟି ବାସ ଯୋଗିନ୍ଦ୍ର
 ନିର୍ମଳଝରେ ଖ୍ୟାତ ବିଷ୍ଣୁ ମନ୍ଦିର
ପୁଟୁଡି ସାଲୁଙ୍କି ପ୍ରବାହମିନ୍ଦ୍ର ।
 ଦେଖିନ ? ତ କଣ ଦେଖିଛ !!

ଗନ୍ଧମାର୍ଦନ ଓ ହରିଶଙ୍କର
ଫୁର୍ଲିଝରନ୍  କଳ କଳ ଝର
ବରଗଢେ ବିଜେ ଅଷ୍ଟ ଶଙ୍କର
ଶଶି ଅହିମଣି ପ୍ରୀତି ଅମର ।
ଦେଖିନ ? ତ କଣ ଦେଖିଛ !!

ହୁମା ବଙ୍କା ଇଶ ମାଛ ପୋଖରୀ
କାଇବଣେ ଶିବ ଦେଉଳଝରି
ଖଣ୍ଡଧାର କୋରାପାଣି ଲହରି
ପ୍ରଧାନପାଟ ର ପ୍ରପାତ ଶିରି ।
ଦେଖିନ ? ତ କଣ ଦେଖିଛ !!

ଶିମିଳିପାଳେ ବାଘ ମହାବଳ
ବଡଘାଘରା ପ୍ରପାତ ଜଳ
ରେମୁଣା ଖୀରଚୋରା ଚପଳ
ଇରମ ବୀର ଧାମ ଉତ୍କଳ ।

ଦେଖିନ ? ତ କଣ ଦେଖିଛ !!

Friday 20 July 2012

ସକାଳ

ଅନେକ ଥର ଯେବେ ବି ମୁ ନିରାଶ ହେଇଛି, ଶୁଣିଛି, ଏଇ ରାତି ବାସ କିଛି ସମୟ ପାଇଁ | ପୁଣି ଏକ ନୁଆ ସକାଳ ଆସିବ, ଆଉ ଏ ରାତି କଟି ଯିବ | ନିରାଶ କୁ ଅନ୍ଧକାର ବା ରାତି ସହ ପ୍ରାୟ ସମସ୍ତେ ତୁଳନା କରନ୍ତି | ମୁ ଭାବେ, ରାତି କଣ ଖରାପ ? ନିରାଶା ଏବଂ ଅନ୍ଧକାର ର ସମ୍ପର୍କ୍ କଣ ମୁ କେବେ ବି ବୁଝି ପାରିନି | ଆଜି ବି ନାହି |

ମୋତେ ତ ଲାଗେ, ରାତି ବେଶୀ ସୁନ୍ଦର | ଦିନ ସାରା ପରିଶ୍ରମ କରି ଏକ ଶ୍ରମିକ ତେ ରାତିଟି ପାଇଁ ହି ଅପେକ୍ଷା କରିଥାଏ | ଯଦି ସକାଳ ହେବ, ତାକୁ ପୁଣି ଥରେ କାମ କରିବାକୁ ପଡିବ |

ଖାଲି ଶ୍ରମିକ କଥା କାହିଁକି, ଆଜି ସମସ୍ତଙ୍କ ସହ ଏ କଥା ସତ | ଅଫିସ୍ ରେ ଥିବା ବେଳେ ଖାଲି ଏ କଥା ମନ କୁ ଅସେ, କେତେବେଳେ ସନ୍ଧ୍ୟା ହେବ, ଏବଂ ଘରକୁ ଯିବାକୁ ମିଳିବ |

ସଂଧ୍ୟାରେ ଘରକୁ ଆସିବାର ସୁଖ ଦିନର ପରିଶ୍ରମ ରେ କାହିଁ ? ତଥାପି ନିରାଶକୁ ରାତି ସହ ତୁଳନା କରିବାର ଯଥାର୍ଥତା ମୁ ଜାଣି ପରେନି |